ನನ್ನೆದೆಯ "ಫುಲ್ ಸ್ಕ್ರೀನ್" ಬ್ಯೂಟಿ

ಸದ್ದಾಗಿತ್ತು, ನೆಲ ನಡುಗಿತ್ತು,
ಹೌದು; ಗಡಗಡ, ಗುಡುಗುಡು.
ಎದೆಯೊಗೆ ಧಡ...ಧಡ...!
ಆದರೂ ಅದೇ ಅಲ್ಲವೇ?
ಹೃದಯ ಬೆಸುಗೆಯ ಹಾಡಿಗೆ
ಮೊದಲೇ ಬಡಿದ ಢೋಲು.
ನೀನು ಕಾಲೆತ್ತಿಟ್ಟಾಗಲೆಲ್ಲ;
ನೆಲ ನಡುಗಿತ್ತು ನೋಡು!
ಅಂದು ಹಾಗೆ ಆಗಿದ್ದೇ ಒಳಿತು,
ನಿನ್ನ ಪ್ರತಿಯೊಂದು ಹೆಜ್ಜೆ;
ಬಲವಂತವಾಗಿ ಎಸೆದ ಗೆಜ್ಜೆ.
ಸದ್ದು, ಸದ್ದು, ಸದ್ದಾಯಿತು;
ಅಂದೇ ಹೃದಯ ಗೆದ್ದಾಯಿತು.
ಬಳ್ಳಿಯಂತೆ ಬಳುಕುತ್ತಾ
ಬಂದಿದ್ದರೆ ನೀನು ಅಂದು;
ನನ್ನ-ನಿನ್ನ ನಡುವಣ
ಪ್ರೇಮಾಂಕುರ ಎಲ್ಲಿ ಸಾಧ್ಯವಿತ್ತು?
ನಿನ್ನ ಪ್ರತಿಯೊಂದು ಹೆಜ್ಜೆ
ನನ್ನ ಎದೆಯೊಳಗೆ
ಪ್ರೇಮದ ಗೆಜ್ಜೆ...
ಗಿಲಗಿಲ ಅಲ್ಲ... ಘಲಘಲ..!
ಒಂದಿಷ್ಟು "ಸೌಂಡ್" ಜಾಸ್ತಿ.
ಹಿಂದೇನಿದು ಸದ್ದು; ಎಂದು
ನಾನಂದು ತಿರುಗಿ ನೋಡದಿದ್ದರೆ?
ನಿನ್ನ ರೂಪದ ಪ್ರಕೃತಿ ಪ್ರಕೋಪ
ನನ್ನ ಎದೆಯಲ್ಲಿ ಹೆಚ್ಚುತಿತ್ತೆ?
ಇಲ್ಲ; ಹಾಗೆ ಆಗುತ್ತಿರಲಿಲ್ಲ.
ಅಂದು ನೀನು ಕಣ್ಣತುಂಬಿದ್ದೆ;
ಸುತ್ತಲಿನ ಜಗತ್ತೆಲ್ಲಾ ನೀನೇ ಆಗಿದ್ದೆ.
ನಿನ್ನ ಕಾಯವೇ ಕವಿದಿತ್ತು;
ಕಣ್ಣು ಆಚೆ-ಇಚೆ ಸರಿಸಿ, ಅರಳಿಸಿ...
ಕತ್ತು ತಿರುಗಿಸಿದರೂ ಬೇರೇನೂ ಇಲ್ಲ.
ಬೇರೇನೂ ಕಾಣಿಸಲಿಲ್ಲ.
ನೀನೆ ಎಲ್ಲಾ; ಅಗಲಗಲ...ಅಗಲಗಲ!
ನಿನ್ನ ರೂಪವೇ ಅಂಥದು;
ನೀನೇ ತುಂಬಿಕೊಂಡೆ
ನನ್ನೆದೆಯ "ಫುಲ್ ಸ್ಕ್ರೀನ್"
ಯಾರೇನೇ ಅಂದರೂ ಬೇಸರ ಬೇಡ;
ನಿನ್ನ ಕಾಯ ಸೌಂದರ್ಯ
ನನಗಷ್ಟೇ ಗೊತ್ತು,
ಏಕೆಂದರೆ; ನೀನೆ ಅಲ್ಲವೇ...?
ನನ್ನೆದೆಯ ತುಂಬಿರುವ
"ಫುಲ್ ಸ್ಕ್ರೀನ್" ಬ್ಯೂಟಿ!