* ಕ್ಷಮಾ ಇರಲಿ ಬೇಂದ್ರೆ ಮಾಸ್ತರ...!
ಕುಡಿಯೋಣು ಬಾರಾ
ಕುಡಿಯೋಣು ಬಾರಾ
ಕಿಣಕಿಣ ಕಾಜಿನ ಗ್ಲಾಸಿನ್ಯಾಗ
ಸಣ್ಣ ಸಣ್ಣ ಪೆಗ್ಗಿನ್ಯಾಗ
ಹಿಡಿಕಿ ಇರೋ ಮಗ್ಗಿನ್ಯಾಗ
ಹಿಂಡ್ ಜನಾ ಇರೋ ಪಬ್ಬಿನ್ಯಾಗ
ಬಾರ್ ಕೌಂಟರ್ ಕಿಡಿಕಿನ್ಯಾಗ
ಗೆಳಿಯಾನ ತ್ವಾಟದಾಗ
ಚೆಂದದ ಪಾರ್ಟಿನ್ಯಾಗ
ದೊಡ್ಡವರ ಕ್ಲಬ್ಬಿನ್ಯಾಗ
ನಾನು-ನೀನು ಸೇರಿ...
ಕುಡಿಯೋಣು ಬಾರಾ
ಕುಡಿಯೋಣು ಬಾರಾ
ಸಂಜಿ ಹೊತ್ತಿರಲಿ
ಚುಮುಚುಮು ಕತ್ತಲಿರಲಿ
ರಾತ್ರಿ ಹೊತ್ತಿರಲಿ
ಕರಿಮೋಡ ಬಿತ್ತಿರಲಿ
ಬಿಸಿಲು ಹೊತ್ತಿ ಉರಿತಿರಲಿ
ಗಡಗಡಿಸೋ ಚಳಿ ಇರಲಿ
ಜಡಿಮಳಿ ಜಡಿತಿರಲಿ
ಕಾಲಚಕ್ರ ನಡಿತಿರಲಿ
ನಾನು-ನೀನು ಸೇರಿ...
ಕುಡಿಯೋಣು ಬಾರಾ
ಕುಡಿಯೋಣು ಬಾರಾ
ಮದಿವಿ ಬಂತಂತ
ಮಗಾ ಹುಟ್ಟಿದಂತ
ಪರೀಕ್ಷಾ ಪಾಸಂತ
ಹೊಸ ವರ್ಷಾ ಬಂತಂತ
ಹುಟ್ಟಿದ ದಿನಾ ಇವತ್ತಂತ
ಗೆದ್ದ ಸಂತೋಷಕ್ಕಂತ
ಮನಿ ಕಟ್ಸಿದಿಯಂತ
ಹೊಸಾ ಕಾರ್ ತರ್ಸಿಯಂತ
ನಾನು-ನೀನು ಸೇರಿ...
ಕುಡಿಯೋಣು ಬಾರಾ
ಕುಡಿಯೋಣು ಬಾರಾ
ಕಷ್ಟಾನ ತಾಳಲಾರದ
ಇನ್ನಷ್ಟು ಬಾಳಲಾರದ
ಹೆಂಡ್ತಿ ಗೋಳು ಕೇಳಲಾರದ
ಮಕ್ಕಳ ಗದ್ದಲಾ ಸಹಿಸಲಾರದ
ಕೆಲಸದ ಭಾರಾ ಹೊರಲಾರದ
ಹೊಸಾ ಕೆಲಸಾ ಸಿಗಲಾರದ
ಮೋಸಾ-ದಗಾ ಸಹಿಸಲಾರದ
ಸಾಲದ ಹೊರಿ ಹೊರಲಾರದ
ನಾನು-ನೀನು ಸೇರಿ...
ಕುಡಿಯೋಣು ಬಾರಾ
ಕುಡಿಯೋಣು ಬಾರಾ
ಕಷ್ಟಾ-ಸುಖಾ ಎಲ್ಲಾ ಬೆರಿಸಿ
ಶುದ್ಧಾತ್ಮಧಾಂಗ ಭಟ್ಟಿ ಇಳಿಸಿ
ದೇಹಾ ಅನ್ನೊ ಬಾಟಲಿಗೆ ಸೇರಿಸಿ
ಬದುಕು ಅನ್ನೊ ಬೆಲೆ ಬರೆಸಿ
ಸಮಾಜಾ ಅನ್ನೊ ಶಿಸ್ತಿಗಂತ
ಶೋಕೇಸಿನ್ಯಾಗ ಇಟ್ಟಿರೊ
ಬಾಟಲಿಗಳನ್ನೆಲ್ಲಾ ತರಿಸಿ
ಕರ್ಮದ ಕರದವಲಕ್ಕಿ ಜೊತಿಗೆ
ಧರ್ಮದ ಸೋಡಾನೂ ಸೇರಿಸಿ
ನಾನು-ನೀನು ಸೇರಿ...
ಕುಡಿಯೋಣು ಬಾರಾ
ಕುಡಿಯೋಣು ಬಾರಾ