ಮನಿ-"ಮನಿ" ಎರಡೂ ಇಲ್ಲಾ

ನಂಗೊಂದು ಮನಿ ಇಲ್ಲಾ;
ಯಾಕಂದ್ರ ನನ್ ಕಡೆ "ಮನಿ" ಇಲ್ಲಾ!
ಮನಿ ಮಾಡ್ರಿ... "ಮನಿ" ಮಾಡ್ಕೊಳ್ರಿ;
ಹಿಂಗ ಹೇಳತಾರ ಎಲ್ಲಾ.
ನಾ ಕಿವಿಮ್ಯಾಗ ಹಾಕ್ಕೊಂಡಿಲ್ಲಾ.

ನಿನಗಿಂತಾ ಸಣ್ಣೋರೆಲ್ಲಾ
ಕಟ್ಯಾರಲ್ಲಾ ಊರಾಗೊಂದು;
ಬೆಂಗಳೂರಿನ್ಯಾಗೊಂದು ಮನಿ.
ಹಿಂಗ ಅಂತ ಕೇಳತಾರೆಲ್ಲಾ!
ಇದ ಮಾತು ಹೇಳತಾರೆಲ್ಲಾ.

ಬೇರೆಯೋರು ಕೇಳತಾರಂತ
ಕಟ್ಟಾಕಾಗಂಗಿಲ್ಲ ಮನಿನೆಲ್ಲಾ.
ಮನಿ ಕಟ್ಟಾಕ "ಮನಿ" ಬೇಕು.
ಮನಿ ಕಟ್ಟಂತ ಹೇಳಿದೋರು
ಕೊಡತಾರೇನು "ಮನಿ"...?

ನಂದೇನಿದ್ರು "ಕುವೆಂಪು" ಪಾಲಿಸಿ,
ಪುಟ್ಟಪ್ಪ ಕವಿಗೋಳು ಹೇಳ್ಯಾರಲ್ಲ;
ಅದೇನಂತ ನಿಮಗ ಗೊತ್ತಿಲ್ಲಾ?
ಎಲ್ಲಿನೂ ನಿಲ್ಲಬ್ಯಾಡ;
ಮನಿ ಯಾವತ್ತೂ ಕಟ್ಟಬ್ಯಾಡ!

ಅದ ಹಾಡು ಹಾಡಕೋತಿನಿ.
ಮನಿ-"ಮನಿ" ಚಿಂತಿ ಬಿಟ್ಟೀನಿ.
ಮನಿ ಕಟ್ಟೋದು;
"ಮನಿ" ಮಾಡೋದು...!
ನನ್ನ ಕೈಯ್ಯಾಗ ಆಗಂಗಿಲ್ಲ.

ಮನಿ ಮಾಡಾಕ "ಮನಿ" ಬೇಕು.
"ಮನಿ" ಮಾಡಬೇಕಂದ್ರ
ಅದೇನೆನೋ ಮಾಡಬೇಕು!
ಅದು ಆಗಂಗಿಲ್ಲ;
ಮನಿ-"ಮನಿ" ಎರಡೂ ಮಾಡಂಗಿಲ್ಲ.