ಮಿರ್ಜಾ ಗಾಲಿಬ್ ಬರದಿರೋ ಒಂದು ಗಜಲ್ ಸಾಲು ನನಗ ಹೊಸಾ ವರ್ಷದ ಹೊಸ್ತಿಲಿಗೆ ಬಂದು ನಿಂತಾಗ ನೆನಪಾಗತದ. "ಇಕ್ ಭ್ರಾಹ್ಮಣನೇ ಕಹಾಥಾ ಇಸ್ ಸಾಲ್ ಅಚ್ಛಾ ಹೈ..." ಎಂದು ಮಿರ್ಜಾ ಗಾಲಿಬ್ ತನ್ನ ಗಜಲಿನ್ಯಾಗ ಬರೆದಿಟ್ಟು ಹೊಗ್ಯಾನ. ಅದು ಎಂಥಾ ವಿಶಿಷ್ಟ ಸಾಲು ಅಂತ ಒಮ್ಮೆ ಆ ಸಾಲು ಮೆಲುಕು ಹಾಕಿ ನೋಡ್ರಿ; ನೀವು ಹಂಗ ಅದೆಷ್ಟೊಂದು ಸಲಾ ಹಂಗ ಯೋಚನೆ ಮಾಡಿರತೀರಿ ಅಂತ ಅರ್ಥ ಆಗತದ.
ಮೊದಲ ಆ ಉರ್ದು ಭಾಷೆ ಸಾಲನ್ನ ನಿಮಗ ವಿವರಿಸಿ ಹೇಳತೀನಿ. "ಒಬ್ಬ ಭ್ರಾಹ್ಮಣ ಹೇಳಿದ್ದ ಈ ವರ್ಷಾ ನಿನಗ ಛಲೋ ಐತಿ" ಅಂತ ಆ ಸಾಲು ಹೇಳತದ. ಹಿಂಗ ಪ್ರತಿ ಹೊಸಾ ವರ್ಷಾ ಹತ್ತಿರಕ್ಕ ಬಂದಾಗ ಎಲ್ಲಾರ ಮನದಾಗೂ ಹಿಂಗ ಅನಿಸಿರತದ. "ಈ ವರ್ಷಾ ನಮಗ ಛಲೋ ಆಗಬಹುದು" ಅಂತ ಎಲ್ಲಾರೂ ಅನಕೋತಿರತಾರ.
ಕೆಲವ ಜನಾ ಅಂತೂ; ಹೊಸಾ ಕ್ಯಾಲೆಂಡರು ಮತ್ತ ವರ್ಷ ಭವಿಷ್ಯದ ಕೈಪಿಡಿ ತಂದು; ಅದರಾಗ ಈ ವರ್ಷ ನಮಗ ಹ್ಯಾಂಗ ಐತಿ ಅಂತ ಭಾಳ ಸೀರಿಯಸ್ ಆಗಿ ಓದತಾರ. ಆದರ ಅದು ಬರಿ ಮನಸೀಗೆ ಸಮಾಧಾನ ಮಾಡಕೋಳಾಕ! ವರ್ಷಾ ನಿಮಗ ಒಳ್ಳೆದು ಆಗಬೇಕು ಅಂದ್ರ ನೀವ ಪ್ರಯತ್ನಾ ಮಾಡಬೇಕು. ಯಾವದೋ ಭ್ರಾಹ್ಮಣಾ, ಭವಿಷ್ಯಗಾರ, ಜ್ಯೋತಿಷ್ಯ ಹೇಳೋನ ಮಾತಿನಹಂಗ ಯಾವ ವರ್ಷಾನೂ ಇರೋದಿಲ್ಲಾ. ಎಲ್ಲಾ ಸರಿ ಇರೋದು ನೀವು ಹ್ಯಾಂಗ ವರ್ಷದಾಗ ಕೆಲಸಾ ಮಾಡತೀರಿ ಅನ್ನೋದರ ಮ್ಯಾಗ ನಿರ್ಧಾರ ಆಗತದ.
ಕಷ್ಟದಾಗಿದ್ದರೂ, ಮಿರ್ಜಾ ಗಾಲಿಬ್ ಸಂತೋಷದಾಗಿದ್ದ. ಅದಕ್ಕ ಅವನ ಜೀವನಾ ಅನ್ನೋದು ಒಂದು ಸುಂದರವಾದ ಕವಿತಾ ಆತು. ಆದ್ರ; ನಾವು ನೀವು ಎಲ್ಲಾ ಗಾಲಿಬ್ ಹೇಳಿದ ಆ ಸಾಲಿನ ಹಾಂಗ ಯೋಚನೆ ಮಾಡ್ಕೊಂಡಿರ್ತೀವಿ. ಈ ವರ್ಷಾ ಛಲೋ ಆಗಬಹುದು ಅಂತ ಹೇಳಕೋತ ವರ್ಷ ವರ್ಷಾನ ಕಳೀತ ಹೋಗತೀವಿ. ಆ ಸಾಲಿನ ಹಾಂಗ ಯೋಚನೆ ಮಾಡೋದು ತಪ್ಪಲ್ಲ. ಆದರ ಅದು ನಿಜಾ ಆಗೋ ಹಂಗ ಎಲ್ಲಾ ವರ್ಷಾನೂ ಛಲೋ ಮಾಡಿಕೋಳ್ಳುದು ನಮ್ಮ ಜವಾಬ್ದಾರಿ ಆಗಿರತದ. ಭವಿಷ್ಯಾ ಹೇಳೋನು ಹೇಳಿದ್ದು ಖರೇ ಆಗತದ ಅಂತ ಕೈಕಟ್ಟಿ ಕೂತಕೊಂಡ್ರ; ಯಾವ ವರ್ಷಾನೂ ಒಳ್ಳೇದು ಆಗೋದಿಲ್ಲ.
ಅದಕ್ಕ ನನ್ನ ಒಂದು ಸಲಹೆ ನಿಮಗ; ಭವಿಷ್ಯಾ ಹೇಳೋರನ್ನೆಲ್ಲಾ ಕೇಳಿಕೊಂಡು ಸುಮ್ನ ಇರಬ್ಯಾಡ್ರಿ. ನಿಮ್ಮ ವರ್ಷದ ಭವಿಷ್ಯಾ ಛಲೋ ಆಗೋಹಂಗ ನೀವ ಅದನ್ನ ಬರದಕೊಳ್ರಿ. ಓದು, ಕೆಲಸ, ಸಂಸಾರಾ... ಹಿಂಗ ಎಲ್ಲಾನೂ ಛಲೋ ಆಗಿರಬೇಕು ಅಂದ್ರ ನೀವು ಅದಕ್ಕ ತಕ್ಕ ರೀತಿನ್ಯಾಗ ಇರಬೇಕು. ಅದೆಲ್ಲಾದಕ್ಕಿಂಥ ಮುಖ್ಯ ಅಂದ್ರ; ಎಂಥಾ ಕಷ್ಟ, ಸವಾಲು... ಬಂದ್ರೂ ಸಂತೋಷವಾಗಿ ಇರೋದನ್ನ ಕಲಿಬೇಕು. ಆವಾಗನ ನಿಮ್ಮ ಬದಕೂ ಮಿಜರ್ಾ ಗಾಲಿಬ್ ಕವಿ ಹಂಗ ಕಾವ್ಯಪೂರ್ಣ ಆಗತದ...!
ನಿಮಗೆಲ್ಲಾ ಹೊಸಾ ವರ್ಷದ ಶುಭ ಹಾರೈಕೆ... ಹೊಸಾ ವರ್ಷಾ ನಿಮಗ ಛಲೋ ಆಗ್ಲಿ...!