ಅದೇನ್ ಆಗ್ಯದೋ ಗೊತ್ತಿಲ್ಲಾ ಈ ಜನಕ್ಕ.
ಹಿಂಗೂ ಬ್ಯಾಡ-ಹಾಂಗೂ ಬ್ಯಾಡ!
ಚೆಂದಾಂಗಿ ಹಿಂಗ ಇರತೀವಿ ಬಿಡ್ರಿ ಅಂದ್ರ;
ಸಂಪ್ರದಾಯದ ಹಂಗ್ಯಾಕ ಅಂತಾರ.
ನೀವು ಹೇಳಿಧಾಂಗನ ಆಗಲಿ ಅಂದ್ರ,
ನಾವು ಹೇಳಿಧಾಂಗ ಯಾಕಾಗಬೇಕು? ಅಂತಾರ.
ಹ್ಯಾಂಗ್ ಹೇಳಿದ್ರೂ ಹಾಂಗ್ಯಾಕ? ಹಿಂಗಾಗಬೇಕು!
ಹಿಂಗ-ಹಾಂಗ ಅನ್ನೋದ ಅವರ ಕೆಲಸಾ.
ಹ್ಯಾಂಗಾರ ಇರಲಿ; ಒಟ್ಟಿನ್ಯಾಗ
ರೊಳ್ಳಿ ತಗೀತಾರ; ಕೊಳ್ಳಿ ಹೊಡಿತಾರ.
ಅದಕ್ಕ ಅವರೀಗ ಬೇಕು ಇಲ್ಲದ ರೊಳ್ಳಿ.
ರೊಳ್ಳಿ ತಗದು ಕೊಳ್ಳಿ ಇಟ್ಟರನ ಸಮಾಧಾನ!
ಯಾಕಂದ್ರ? ಕೊಳ್ಳಿ ಕೆಂಡದಾಗ
ಅವರ ರೊಟ್ಟಿ ಬೇಯತದ!
ಅವರೀಗ ಸಂಪ್ರದಾಯಾ ಬೇಕು;
ಇವರೀಗ ಅದನ್ನ ಮುರಿಯೋ ಹಟಾ!
ಹಟಾ ಅಲ್ಲಾ ಅದು; ಅವರಿಗದು ಚಟಾ.
ತಣ್ಣಗ ಕುಂತಕೊಳ್ರೋ
ತು... ಅಪ್ಪಗಳಾ ಅಂತ...
ಗದಗಿನ ಗತ್ತಿನ್ಯಾಗ ಗದರೀಸಬೇಕು.
ಸೆಟ್ಲಿಮೆಂಟ್ ಹುಡುಗರ ತಾಕತ್ತಿನ್ಯಾಗ
ಹಿಡುದು ಗದಗಬೇಕು!
ಆವಾಗ ಬುದ್ದಿ ಬರತೈತಿ;
ಅವರೆಲ್ಲಾರ ಸದ್ದು ಅಡಗತೈತಿ.