"ಅದು" ಬಂದಾಗ ಬರಬೇಕಾ "ಇದು"
ಇದಿಹಾಂಗ "ಇದು" ಈಗ ಬಂದದ.
ಇತ್ತಾಗ "ಇದು" ಸೆಳಿತೈತಿ;
ಅತ್ತಾಗ "ಅದು" ಕಾಡತೈತಿ...!
ಎತ್ತಾಗ ಗಮನಾ ಕೊಡಬೇಕು?
ಇತ್ತಾಗ "ಇದು" ಬಿಡೋದಿಲ್ಲಾ;
ಅತ್ತಾಗ "ಅದ"ನ್ನ ಬಿಡಾಕ ಆಗಂಗಿಲ್ಲಾ.
ಥೂ... ಎರಡೂ ಒಟ್ಟಿಗೆ ಬರತಾವ!
"ಇದು" ಮತ್ತ "ಅದು" ಜೊತಿಗೇ...!
ಅಪ್ಪಾ, ಅಮ್ಮ, ಅಣ್ಣಾ, ಅಕ್ಕಾ...
ಎಲ್ಲಾರೂ "ಇದು" ಬಿಟ್ಟು,
"ಅದರ" ಕಡೆ ಲಕ್ಷ್ಯಾ ಕೊಡು ಅಂತ!
ಮನಸ ಮಾತ್ರ "ಇದರ" ಕಡೆ.
"ಅದರ" ಕಡೆ ಲಕ್ಷ್ಯಾ ಕೊಡಬೇಕು,
ಬದುಕಿಗೆ "ಅದು" ಮುಖ್ಯಾ ಆಗ್ಯದ.
ಆದರ "ಇದು" ಹ್ಯಾಂಗ ಬಿಡಬೇಕು?
ಹೊಸಾ ಗೆಳತಿಹಾಂಗ ಸೆಳಿತೈತಿ.
"ಅದು" ಬದುಕಿಗೆ ದಾರಿ,
"ಇದು" ಗೆಳತಿ ಜೊತಿ ಕುಂತ ಸೋಮಾರಿ!
ಇತ್ತಾಗ "ಅದು" ಬೇಕು;
ಅತ್ತಾಗ "ಅದು" ಬೇಕ ಬೇಕು...!
ಇತ್ತಾಗ "ಇದ"ನ್ನ ಹ್ಯಾಂಗ ಬಿಡಬೇಕು?
"ಇದು"-"ಅದು"; "ಅದು"-"ಇದು"
ಎರಡರ ನಡುವ ಸಿಕ್ಕು ಸಾಕಾಗ್ಯದ.
ನಿಮಗೂ ಹಂಗ ಆಗಿರಬೇಕಲ್ಲಾ?
ಹಿಂಗಂತ ಕೇಳತಾನ ಹುಡುಗಾ ಅವಾ;
"ಪಿಯುಸಿ" ಪರೀಕ್ಷಾಕ್ಕ ಕುಂತಾವಾ.
ಇತ್ತಾಗ ವಿಶ್ವಕಪ್ ಅನ್ನೋ "ಇದು",
ಅತ್ತಾಗ ಓದಬೇಕು ಅನ್ನೋ "ಅದು".
ಭಾಳ ದೊಡ್ಡ ಕಾಡಾಟ!
ಅದಕ್ಕ ಐಸಿಸಿಗೆ ಒಂದಿಷ್ಟು ಹಿಡಿ ಶಾಪಾ.
ಪರೀಕ್ಷಾ ಹೊತ್ತಿಗೇನ "ವಿಶ್ವಕಪ್" ಯಾಕ?